9. Dezember
Wenn ...
Wenn dr Schneesturm durch de Falder
wie dr wilder Gaager braust,
daar un gener in de Walder
sich enn rachten Lichterbaam maust,
wenn dr Lehrer mit de Kinner
singt dos Lied vun Tannebaam,
un de Kinner of dr Zschinner
gieh un kumme när ehaam.
Wenn dr Voter un de Mutter
überrachne mol ihr Gald,
un zun Backen när de Butter
un noch su e mannichs faahlt,
wenn de Weihraachkarzle duften,
un dr Bargma werd geleimt,
wenn se alle müssen schuften,
wall de Eck werd eigeraimt,
wenn de Mutter mit`n Hader
fix durch alle Stöbn läft
un de Kinner un ne Voter
ball in Wasserdrahsch dersäft,
wenn de Kinner obnd halb neine
pünktlich waarn nei`s Bett gebracht,
wenn dr Rupprich tut erscheine
un dr Kuhhos werd geschlacht,
wenn de Peremett tut laafen,
wenn Musikprob in dr Kirch,
un mer tut enn Haufen kaafen –
dann is Weihnacht im Gebirg.
Max Wenzel