2 / 28
1. Dezember
Unnre Manneln
Bal is wieder mol su weit,
es kimmt de liebe Weihnachtszeit.
Drim steign mr heit ofn Buden nauf
un wecken unnre Manneln auf.
He, Bargma, Engel, Raacherma,
du, Nussknacker bist aah miet dra.
Ihr habt genug geschlofen nu,
itze is aus mit eirer Ruh.
Mir alle fräe uns doch aah,
dass mr eich endlich wiedersah.
Mei Bargma kimmt ans Fanster hie,
weil er do alle Gahr will stieh.
Dr Engel von dr Großmama
Im neien Kläd stieht aah miet dra.
Dr Nussknacker in ruter Gack
hot nahm dr Peremett sein Flack.
Nu fahlt bluß noch dr Raacherma.
Dan stelln mr glei nahm Christbam na
un stecken ne, dos muss doch sei,
aah fix e Raacherkerzel nei,
damit er tüchtig qualme ka,
dä dos gefällt en Raacherma.
Ach, wie is dos doch wieder schie!
Gern guckt mr zu dan Manneln hie.
Nu kommt, ihr Gunge, un ihr Mäd.
Ihr habt ja doch de gräßte Fräd.
Aber aah ihr Grußen seid bereit
un frät eich of de Weihnachtszeit.
Margarete Junghans